O alumnado do CEIP de Lourido xa estrea este curso o novo camiño escolar seguro habilitado polo Concello de Poio. Esta actuación facilita o acceso a pé ao centro a través dun espazo reservado especificamente para os peóns, garantindo un percorrido máis seguro desde o aparcadoiro, especialmente nas horas punta de entrada e saída do colexio.
A concelleira de Cultura e Educación, Natalia Sabarís, participou recentemente nunha xornada organizada polo centro para concienciar os estudantes sobre o uso responsable e seguro desta ruta. Sabarís destacou que esta obra era "unha demanda histórica da comunidade escolar de Lourido pero, sobre todo, era unha necesidade e unha prioridade para garantir a seguridade do alumnado".
A concelleira recoñeceu que a concentración de vehículos nas inmediacións do colexio xeraba "situacións de risco" para os peóns, circunstancia que se agravaba co mal tempo. Lembrou que o Goberno local asumiu este compromiso coa dirección do colexio e a ANPA, unha intervención avalada polo Consello Escolar.
Os traballos incluíron o pavimentado dun sobreancho da estrada, sinalización horizontal para reservar unha franxa segura para peóns e a habilitación dun paso de peóns elevado que tamén axuda a reducir a velocidade dos vehículos na zona.
Durante a xornada, alumnos de Infantil e 6º de Primaria percorreron o tramo entre o colexio e o aparcadoiro. Os maiores guiaron aos pequenos, explicándolles as normas de seguridade. Ao remate, compartiron a experiencia e analizaron os erros detectados.
O obxectivo é que os nenos e nenas trasladen a mensaxe ás súas familias e conciencien sobre a importancia de respectar o espazo reservado para o camiño escolar seguro, evitando estacionar nel durante as entradas e saídas.
A iniciativa está a ter unha boa acollida, e a maior parte do alumnado xa interiorizou o funcionamento e as pautas para utilizar o novo camiño escolar de maneira segura.
