O Concello de Poio puxo en marcha o Comité de Seguridade e Saúde, un órgano clave para a participación do persoal municipal na prevención de riscos laborais e a mellora das condicións de traballo. A constitución deste comité reforza o compromiso do goberno local coa seguridade, a saúde e o benestar dos empregados públicos.
Este órgano, que integra de forma equitativa representantes do Concello e do persoal, conta coa participación do alcalde, Ángel Moldes, e dos concelleiros Marcial García (Obras e Servizos), Maritxe González (Seguridade e Promoción Económica) e Tucho Muíños (Persoal), xunto a representantes sindicais e dos traballadores.
O obxectivo principal é establecer un espazo continuo de diálogo e colaboración para identificar riscos, propor melloras e implementar medidas preventivas en todos os servizos municipais. Esta iniciativa cumpre coa Lei de prevención de riscos laborais de 1995 e reafirma a vontade do goberno de construír unha Administración máis responsable e comprometida cos dereitos laborais.
A creación deste comité forma parte dun plan máis amplo de modernización da Administración municipal, que inclúe tamén a recente modificación da Relación de Postos de Traballo (RPT). Ambas as actuacións buscan unha administración máis áxil, eficiente e adaptada ás necesidades actuais, combinando a mellora da estrutura organizativa co reforzo da prevención e a participación dos traballadores.
