A iniciativa da empresa, encargada da xestión de residuos no municipio, contempla a creación dun aparcadoiro para camións de lixo, un taller mecánico, un lavadeiro industrial e un punto limpo municipal. Esta proposta xerou unha forte oposición entre os residentes da zona rural, que alertan sobre as posibles consecuencias.
A Plataforma Veciñal de San Xulián argumenta que unha instalación destas características tería un impacto directo na saúde e seguridade dos habitantes. Rosana Pequeño García, vogal do colectivo, subliñou que a localización elixida está próxima a un curso fluvial e fronte a unha parada de autobús escolar, o que incrementa os riscos para os veciños.
“"O que reclamamos é a nosa negación rotunda a pretensión de armar na canteira un lavadoiro, taller de vehículos e punto limpo pola situación e a salubridade que afecta, porque está a escasos metros das vivendas."
Desde a plataforma, advirten que o conflito vai máis alá das simples molestias veciñais, converténdose nunha cuestión de cumprimento normativo. Sinalan que a instalación podería xerar ruído constante, malos cheiros e riscos de vertidos contaminantes. Ademais, Pequeño destacou que os terreos están cualificados como chan rústico de uso dotacional público, o que non debería beneficiar exclusivamente a unha empresa privada.
“"Non é só unha cuestión de molestias, é unha cuestión de legalidades, saúde e sentido común. A instalación pode supoñer ruido continuo, cheiros e riscos de vertidos contaminantes. Non imos permitir que o rural se converta nun espazo degradado."
Como alternativa, os afectados suxiren trasladar a actividade ao polígono industrial de Barro, onde Urbaser xa opera e onde, segundo defenden, estas actividades terían un encaixe máis lóxico. A plataforma esixe transparencia ao Goberno local e que se descarte definitivamente a localización proposta para protexer o territorio.
