Os veciños de San Xurxo de Sacos, Santa María, todas as parroquias de Cerdedo e parte de Forcarei e A Lama sufriron un corte de subministro eléctrico dende as 14.30 horas deste martes. A causa foi a caída dunha árbore sobre un cable do tendido, o que desencadeou unha serie de fallos no sistema.

Dende Naturgy, empresa subministradora, confirmaron que o incidente se orixinou pola tala dunha árbore por parte dun particular na zona de Dorna. A árbore caeu sobre un cable do tendido eléctrico, provocando un apagamento que se prolongou durante varias horas. A compañía estimou que uns 3.000 clientes se viron afectados, aínda que os traballos de reparación permitiron xa restablecer o servizo á maioría.

O Concello de Cerdedo-Cotobade comunicou o incidente a través das súas redes sociais, chamando á calma aos veciños e confiando nunha rápida resolución. A situación complicouse polas obras de ampliación e reforzo na subestación de San Xurxo de Sacos, que está sen servizo. Isto obriga a que o subministro para a zona dependa dun tramo de Lalín a Forcarei, onde se produciu a segunda avaría.

O alcalde de Cerdedo Cotobade, informou de que se mantén contacto directo coa empresa. Explicou que a caída da árbore en Dorna afectou inicialmente á zona de Sacos, e como consecuencia, o sistema xerou un segundo fallo que impactou en Cerdedo, A Lama e Forcarei.

Ás 20.00 horas, equipos de UFD, a empresa distribuidora, conseguiran devolver o servizo a case todos os afectados, priorizando as liñas de O Candán, Forcarei e A Lama, e posteriormente o eixo Cerdedo-Sacos.