O presidente da Xunta, Alfonso Rueda, destacou hoxe o avance dos traballos de mellora do saneamento no concello de Marín. Esta actuación, que supón un paso decisivo na estratexia do Goberno galego para mellorar a calidade das augas no conxunto da ría de Pontevedra, conta cun investimento de 4,1 millóns de euros.
As obras executadas na contorna do río Lameira inclúen a instalación dun novo colector fóra do leito, un novo tanque de tormentas e a mellora do bombeo para reducir o risco de verteduras. Ademais, creouse unha senda peonil de 1,2 quilómetros e novos espazos públicos co obxectivo de mellorar a contorna natural e devolverlle o río á veciñanza.
Este proxecto insírese nunha estratexia global da Xunta que destina máis de 56 M€ para beneficiar a uns 242.000 veciños de Marín, Pontevedra e Poio, contribuíndo á calidade ambiental das cidades galegas.
Rueda subliñou a importancia de actuar nas redes municipais que levan a auga á depuradora, xa que "de nada serven investimentos tan importantes como o que estamos facendo nunha depuradora para miles de persoas, se o que chega á depuradora e se manda polo emisario non chega en condicións axeitadas". Lembrou que, aínda que o saneamento é unha competencia municipal, o Goberno autonómico colabora técnica e economicamente cos concellos.
O presidente tamén sinalou que a mellora da calidade das augas protexe sectores como o mar, as praias e o turismo, elementos fundamentais para a imaxe de Galicia.
