Rubén Domínguez, técnico do Pontevedra CF, comparou a situación actual coas expectativas iniciais da tempada, sinalando o gran salto de moral do equipo. "Estamos coa moral polas nubes", afirmou, ante un partido que pode selar a clasificación para o play-off polo ascenso a categoría profesional.
Para este encontro crucial, o equipo recupera a Eimil, aínda que Álex González arrastra un golpe. O adestrador ourensán non desvelou quen ocupará o lateral esquerdo ante a ausencia de Miguel Cuesta, describindo unha semana de traballo "con normalidade" e sen "sobresaltos".
“"He vivido dous play-out, ascensos e algunha promoción e non é comparable loitar por gañar algo, por ascender, que facelo por non perder algo. Aí non dormes, dáslle mil voltas ás cousas, tes o medo a perder algo. Aquí, no peor dos casos, imos clasificarnos para a Copa do Rey. Pero, e se gañamos? E se ascendemos? O noso foco está no que podemos conseguir, porque non temos nada que perder. Estamos moi ilusionados co partido."
Domínguez agarda un Pasarón cheo, lembrando partidos pasados con grandes entradas como o Pontevedra-Ourense ou o Pontevedra – Racing de Ferrol, e espera que se manteña a "racha" de bos resultados como local.
O preparador granate recalcou que a súa principal preocupación é o propio equipo. "Preocúpame nós. Contra o Tenerife xogamos un mal partido. Non estivemos ben. Mañá temos esa primeira final do ano e debemos estar todos xuntos para conseguilo", declarou. Engadiu que o obxectivo é "facer un bo xogo que nos leve a gañar ou, se non o facemos, ser o suficientemente competitivos para vencer. Sabemos que temos que gañar. Non nos vai valer outro resultado."
Respecto ao desenvolvemento do partido, Domínguez prevé un encontro "hipercerrado" debido ao que se xogan ambos os equipos. "Temos que saír a madurar o partido e gañalo. Non creo que vaiamos gañar como o día contra o Bilbao Athletic. O normal é que sexa un partido hipercerrado [...] E hai que gañalo cando o árbitro pite o final. Hai que ser estables sabendo que unha das nosas fortalezas é conceder pouco e tamén xerar moito en Pasarón", explicou.
O vestiario afronta o duelo cunha gran responsabilidade, pero sen deixarse levar pola presión. "Temos que ser responsables porque sabemos que xogamos coa ilusión dunha afección, toda unha comarca, un club, coa nosa. A presión era salvar a categoría e por sorte nunca vivimos ese risco", sinalou.
Sobre o rival, o Avilés Industrial, que precisa un punto para salvar a categoría, Domínguez recoñeceu que "é un equipo que na súa parte ofensiva ten un gran rendemento con bos xogadores. Xeran moito". Engadiu que, aínda que defensivamente é o que máis encaixa, "é o seu estilo". O preparador e o seu axudante, Adrián Abalo, non poderán sentar no banco por sancións, pero Domínguez confía en que, como xa ocorreu noutra ocasión, "saia ben".
