O proxecto, no que participan dez socios de seis países diferentes, busca integrar tecnoloxías respectuosas co medio ambiente no espazo público. Entre as pezas expostas destacan bancos e tumbonas fabricados con ácido poliláctico (PLA), un bioplástico obtido mediante a fermentación de vexetais como a cana de azucre e a iuca.
A fabricación destas estruturas, que miden tres metros de longo por 1,5 metros de alto, realizouse mediante impresión 3D de gran formato. Este proceso produtivo destaca pola súa eficiencia, xa que non require moldes e minimiza a xeración de residuos ao utilizar estritamente o material necesario.
Ademais do mobiliario, a mostra inclúe céspede artificial fabricado con materiais biobasados e paneis decorativos para a construción feitos a partir de restos agrícolas, como palla de cebada. Estas solucións buscan demostrar a viabilidade de materiais alternativos aos derivados do petróleo.
“"Pontevedra está na vangarda da investigación europea baseada na busca de materiais que sexan compatibles cos obxectivos do milenio, coa Axenda 2030 e, sobre todo, con reducir a pegada para conseguir un planeta mellor."
Durante o semestre que durará a exposición en Pontevedra, realizarase un seguimento da evolución e conservación das pezas ante as condicións meteorolóxicas e o uso diario. O obxectivo final é avaliar a súa resistencia e a posibilidade de escalar a súa produción para unha futura comercialización no mercado.
