O Concello de Pontevedra puxo en marcha o proxecto para crear unha pista curta de atletismo cuberta no Instituto de Educación Secundaria A Xunqueira I. A concelleira de Deportes, Anabel Gulías, confirmou no Pleno municipal que o departamento leva traballando nesta posibilidade desde abril de 2025, cando se abordou a ampliación de infraestruturas deportivas.
Gulías, representante do BNG, anunciou que xa se deu a orde para comezar a redactar o deseño da actuación. O obxectivo principal é saldar unha débeda histórica co deporte pontevedrés, proporcionando unha instalación que non só garanta os adestramentos dos clubs locais, senón que tamén poida ser utilizada para a celebración de competicións oficiais.
“"Non é viable"
Este anuncio xurdiu durante o debate dunha moción presentada polo PSOE, que propoñía a creación dun módulo cuberto de atletismo na cidade, suxerindo o Recinto Feiral como posible emprazamento provisional. A concelleira de Deportes considerou que esta proposta "non é viable" debido á intensa programación cultural e de eventos que acolle habitualmente dita sede municipal, aínda que se comprometeu a estudar alternativas.
A moción socialista, coas matizacións da concelleira, foi aprobada cos votos a favor dos tres grupos presentes na Corporación municipal. Na mesma sesión plenaria, celebrada na Casa Consistorial, tamén se deron luz verde por unanimidade a outras dúas mocións da oposición: unha do PSOE para estudar a ampliación do CEIP Álvarez Limeses na antiga casa de profesores, en colaboración coa Xunta, e outra do PP para instar a reforma integral da nave de piragüismo das Corvaceiras, pendente da cesión da instalación por parte de Portos de Galicia.
