O director de Turismo de Galicia, Xosé Merelles, participou na presentación da quinta edición do Festival de Arte Rupestre de Campo Lameiro Laeros. O evento terá lugar o próximo 23 de agosto no Parque Arqueolóxico de Arte Rupestre de Campo Lameiro (PAAR), situado en Campo Lameiro (Pontevedra).
Merelles destacou o apoio do Goberno galego a este festival singular, organizado polo concello de Campo Lameiro coa colaboración da Xunta de Galicia e a Deputación de Pontevedra. Turismo de Galicia investiu máis de 74.000€ neste evento desde 2022.
A programación deste ano inclúe como novidade un especial interese na accesibilidade, con materiais, obradoiros e exhibicións adaptadas para o público non vidente.
O festival, que congrega anualmente a preto de 1.600 persoas, ten un marcado carácter familiar e ofrece actividades dirixidas ao público infantil. Segundo Merelles, o evento "fomenta a xeración dun turismo diversificado que favorece a dinamización cultural e económica das áreas rurais" e achega valor á recreación histórica.
A proposta, con entrada gratuíta ata completar aforo, alíñase coa Estratexia de Turismo de Galicia 2030. Merelles sinalou que a cita "impulsa a promoción dunha oferta turística diversa e baseada no patrimonio singular de Galicia", permitindo aos visitantes gozar dunha experiencia única no patrimonio arqueolóxico e cultural da Idade de Bronce do PAAR.
