O director xeral de Gandería, Agricultura e Industrias Agroalimentarias, José Balseiros, visitou hoxe os concellos da Lama e Cerdedo Cotobade para supervisar os traballos realizados en dous novos pasteiros. A Consellería do Medio Rural destinou case 470.000 euros para a súa posta en marcha, que abarca unha superficie total de 64 hectáreas e inclúe a preparación do terreo, así como a construción de novas infraestruturas e melloras para o benestar do gando.
No concello da Lama, o pasteiro do monte en man común da Xesta conta con 33 hectáreas e recibiu un investimento superior aos 228.500 euros. Os traballos incluíron roza mecanizada, abonado, sementeira e pase de rulo, ademais da instalación de seis cancelas e dous comedeiros.
Pola súa banda, en Cerdedo-Cotobade, o pasteiro en man común de Quireza dispón de 31 hectáreas. Para o seu desenvolvemento, destináronse máis de 240.400 euros, que cubriron tarefas similares de roza, abonado e sementeira, así como a instalación de tres cancelas.
José Balseiros destacou a importancia destas infraestruturas para o impulso do rural e a protección dos terreos forestais fronte a posibles lumes.
Estes proxectos enmárcanse no Plan de Pastos de Galicia, que desde 2020 permitiu mobilizar case 2.500 hectáreas en 106 pasteiros, cun investimento total de case 15 millóns de euros.
