A conmemoración, que orixinalmente estaba prevista para o pasado sábado, trasladouse ao luns pola tarde para permitir unha maior asistencia de veciños e autoridades, respectando a solemnidade do Sábado Santo. Os actos comezaron na rúa Augusto Miranda, cunha ofrenda floral fronte ao monolito que recorda a xesta de 1809, cando Juan Gago de Mendoza e as Alarmas do Morrazo defenderon as costas locais da ocupación napoleónica.
Posteriormente, no salón de actos do Museo Municipal Manuel Torres, tivo lugar a entrega do Premio Liberación. O xurado desta edición decidiu de forma unánime outorgar o galardón á Asociación Museo do Mar de Marín. Este premio busca recoñecer a entidades ou persoas que, a través do seu traballo e compromiso, enriquecen significativamente a historia, cultura ou benestar da cidadanía marinense. A concelleira de Cultura, Marián Sanmartín, foi a encargada de conducir a cerimonia.
“"Cando un pobo decide non renderse, non hai forza que o someta. A historia non se escribe para pedir perdón; escríbese para ser lembrada, aprender dos erros e para entender quen somos."
José Iglesias, presidente da Asociación de Veciños da Moreira, ofreceu unha perspectiva histórica sobre o 4 de abril, mentres que o cronista Julio Santos destacou a labor da asociación premiada, subliñando que o Museo do Mar non só custodia obxectos, senón que tamén proxecta actividades que garanten a súa seguridade futura e o seu valor cultural para a comunidade.
A acta do xurado xustifica o premio pola intensa actividade anual da Asociación Museo do Mar, que contribúe á identidade local. Entre as súas iniciativas salientan a organización do Festival Cine do Mar, a divulgación a través de exposicións e conferencias, homenaxes ás mulleres e homes do mar, a promoción da Xuntanza Mariñeira e visitas culturais a enclaves como as illas de Ons, Tambo ou San Simón.
“"Do mar naceu a nosa fortuna e tamén foi o que nos imprimiu un carácter propio, un xeito de ser. É a nosa responsabilidade facer chegar todo este patrimonio material e inmaterial ás novas xeracións, e o Museo do Mar cumpre nisto un labor importantísimo."
A alcaldesa, María Ramallo, clausurou o acto, resaltando a importancia do mar na identidade de Marín e a responsabilidade de transmitir este patrimonio ás novas xeracións, un labor no que o Museo do Mar xoga un papel fundamental.
