O recoñecido escritor Luís Rei presentou este domingo a súa última obra, Elas dúas (Galaxia, 2026), unha novela que ten como protagonistas a África, Viviana e a propia cidade de Pontevedra. O acto tivo lugar no edificio Castelao do Museo de Pontevedra, onde o autor estivo acompañado pola catedrática Rosario Álvarez e polo director de edicións de Galaxia, Marcos Calveiro.
Rei cualificou a súa entrada no selo editorial Galaxia, tras máis de 40 anos de carreira, como un "ingreso no PTVismo" (pontevedresismo), destacando a importancia da editorial galega. Calveiro, pola súa banda, presentou a Rei como "un dos nosos grandes prosistas".
Rosario Álvarez sinalou que, aínda que Luís Rei non é "PTV" (De Pontevedra de Toda a Vida), a súa longa residencia na cidade desde 1982 confírelle un forte vínculo coa localidade. Ela mesma declarouse "tan pontevedresa como a súa novela", xustificando a súa presenza no acto.
Tanto o autor como Álvarez coincidiron en que a Pontevedra dos anos 50 que se retrata na novela, con espazos e personaxes da memoria sentimental da cidade, xa non existe hoxe en día. Rei engadiu que o libro é "dunha Pontevedra que efectivamente xa non existe máis alá da fantasía e dos recordos de quen a viviu".
O propósito inicial da novela, segundo explicou Luís Rei, era "falar da superación de diferentes barreiras como a clase social ou o amor de dúas mulleres ante a lei", converténdose nunha "historia dun amor perseguido e disimulado". Álvarez corrixiu suxerindo que se contaban "varios amores" nunha cidade que funciona como "unha fábrica de segredos", e engadiu que a novela pode ser gozada por calquera lector, non sendo necesario ser de Pontevedra.
“"Eu creo na nobreza das persoas e en que iso prevaleza, aínda sabendo que o mundo está cheo de inxustizas e de velenos. É importante ter ese norte vital presente."
Luís Rei tamén subliñou a importancia de cargar a narrativa cun "compromiso humanista", crendo na "nobresa das persoas" a pesar das inxustizas do mundo.
Sobre o seu proceso creativo, o autor comentou que "escribes unha frase e, a partir de aí, vaslle colgando o resto", e destacou que o principal pecado dun libro é ser aburrido, polo que a "claridade" é a cortesía mínima co lector. Con retranca, sinalou que escribir un libro "é a cousa máis fácil do mundo".
Elas dúas, que saíu á venda o pasado 19 de maio, narra a historia de amor entre África Brea, unha estudante de Maxisterio procedente de Muros, e María Viviana Mariño, unha profesora apaixonada pola música.
