A conselleira de Medio Ambiente e Cambio Climático, Ángeles Vázquez, acompañada do delegado territorial da Xunta en Pontevedra, Pablo Fernández, visitou as actuais dependencias do Laboratorio de Medio Ambiente de Galicia no Pazo de Lourizán. Explicou que o traslado a unhas dependencias sen uso no edificio administrativo da Xunta na cidade permitirá reforzar o papel do laboratorio como referente nacional e internacional en investigación ambiental e loita contra o cambio climático.
Os traballos de adaptación das novas instalacións, cun orzamento de máis de 700.000 euros, comezarán a próxima semana. A actuación consistirá no reacondicionamento interior dun espazo de 450 m2 e no seu equipamento como laboratorio, incluíndo unha nova distribución e sistemas conectados a través de galerías de servizo co novo mobiliario técnico específico.
O Laboratorio de Medio Ambiente de Galicia, acreditado a nivel nacional desde o ano 2002, realiza análises químicas e microbiolóxicas en augas naturais e mariñas, así como análises químicas en augas residuais e en soportes captadores de aire ambiente. O seu traballo divídese en catro programas de control: augas continentais, costeiras e de transición; augas subterráneas; calidade do aire; e encoros de captación para consumo humano.
Ademais, o organismo colabora no control de cianobacterias nos encoros de Galicia-Costa, na avaliación da calidade do aire e participa como apoio á inspección ambiental. Tamén realiza análises a petición doutros departamentos da Xunta, organismos públicos e institucións, como universidades, a unidade adscrita da policía autonómica ou o Seprona, para estudos relacionados con incidentes ambientais ou rexistro de especies.
O Laboratorio de Medio Ambiente de Galicia conta con dúas sedes: a de Pontevedra, especializada en análises biolóxicas e control de calidade das augas, e a da Coruña, dedicada á análise química e ao control do aire ambiente.
