A Deputación de Pontevedra celebrou este xoves a cerimonia de entrega da cuarta edición dos premios de opinión xornalística #MulleresQueOpinan. Estes galardóns, que buscan promover o exercicio da opinión xornalística por parte das mulleres e fomentar unha nova canteira de opinadoras, recoñeceron os mellores traballos presentados sobre as temáticas abordadas no congreso deste ano.
As gañadoras desta edición son Anusch Lores Lemos, polo artigo "Hijas del desgaste" na modalidade en castelán, e Rosa Taboada Rey, por "A tristura democrática do amor" na categoría en galego. Cada unha recibirá un premio de 1.000 euros.
O acto, celebrado no exterior do Pazo provincial, contou coa presenza do vicepresidente da Deputación, Rafa Domínguez, e a deputada de Igualdade, Paula Bouzós, quen xunto á concelleira de Igualdade de Pontevedra, Anabel Gulías, fixeron entrega dos premios.
O vicepresidente Rafa Domínguez destacou o éxito da convocatoria, que recibiu un total de 14 artigos en castelán e 12 en galego. Sinalou que iniciativas como esta "contribúen á liberdade e axudan a mellorar o día a día", e que institucións como a Deputación e o Concello deben apoialas por ser "algo que nos une".
Domínguez tamén puxo en valor o encontro "As mulleres que opinan son perigosas", cualificándoo de "máis necesario que nunca" ante a aparición de "espazos para o negacionismo e correntes que van en contra do feminismo". Subliñou o compromiso da Deputación de Pontevedra en seguir apoiando este tipo de iniciativas.
Os Premios #MulleresQueOpinan son unha iniciativa conxunta da Deputación de Pontevedra e o Concello de Pontevedra. Os artigos orixinais, escritos por mulleres, podían ser inéditos ou xa publicados en medios, e debían tratar sobre a experiencia como espectadora ou asistente aos relatorios e xornadas do congreso.
