A conferencia impartida polo historiador da arte Luis Ángel Bermúdez supuxo o inicio da fase de difusión dun traballo de campo que, durante anos, rescatou a biografía e a pegada devocional deste frade para o público xeral. Bermúdez destacou a importancia de Fray Juan de Navarrete non só para Pontevedra, senón tamén para Galicia, pola súa defensa dos dogmas católicos fronte ao protestantismo e polo legado que deixou tras a súa morte, convertendo a súa sepultura no convento nunha especie de santuario.

O proceso de investigación, que agora se presenta publicamente, arrincou case por casualidade cando Bermúdez atopou a mención dun "Beato Juan de Pontevedra" nun vello calendario de santos galegos. A partir dese achado, o investigador foi encadeando descubrimentos en libros antigos que revelaron a transcendencia do frade.

Este traballo de arquivo cristalizou nunha publicación e conectou co departamento para a Causa dos Santos da Arquidiocese de Santiago, así como co interese de párrocos locais e dos propios franciscanos. A charla permitiu expoñer os datos biográficos reconstruídos, o perfil espiritual do frade e as vicisitudes dunha causa de canonización que tivo varios intentos internos sen culminar.

O historiador tamén detallou o "legado póstumo" de Fray Juan, cunha forte devoción que xerou tanto en Pontevedra como en Nantes, onde faleceu en 1528. A proximidade do quinto centenario do seu falecemento engade un elemento simbólico clave, que Bermúdez ve como unha oportunidade para impulsar o proceso e poder ver algún día "no balcón de San Pedro o retrato deste pontevedrés de adopción".

Tras a fase de investigación, a Igrexa local dá o primeiro paso visible dun itinerario de divulgación que continuará despois do verán coa presentación da documentación ante a Santa Sede. "Agora comeza a serie pública, a exposición de todo este traballo", resumiu Bermúdez, convencido do percorrido que aínda ten a historia de Fray Juan de Navarrete entre os fieis da Boa Vila.