A experiencia Erasmus+ está a marcar un antes e un despois na vida de seis estudantes do CIFP Montecelo de Pontevedra. Repartidos entre Xénova e Pescara, en Italia, o alumnado de Deseño e xestión da produción gráfica e de Anatomía patolóxica e citodiagnóstico coinciden en que esta oportunidade formativa non só lles achega ao mundo laboral, senón que tamén lles axuda a "superarse a si mesmos" e a "cambiar a actitude sí o sí", tal como sinala Jorge Cambra, un dos participantes.
Jorge Cambra, xunto con Marina Macía, Mercedes Suárez e Irene Fernández, está a completar a súa formación en empresas do sector gráfico en Xénova. Mentres tanto, Aránzazu Barreiro e Lucía Gago fan o propio en Pescara, no ámbito da anatomía patolóxica. O centro pontevedrés subliña que todas as opinións converxen nun punto: a experiencia Erasmus+ "cambia para mellor".
Marina Macía, que realiza as súas prácticas en Arti Grafiche Litoprint, recoñece que os primeiros días foron "duros" e que as prácticas non cumprían as súas expectativas iniciais. Non obstante, logrou adaptarse e agora séntese "máis preparada para o mundo laboral real". Pola súa banda, Mercedes Suárez e Irene Fernández, que estiveron en SEF Centro Servizi, detallan a ampla gama de coñecementos adquiridos, desde o deseño de logotipos e impresións dixitais ata o uso de guillotinas e encadernacións.
Os catro alumnos en Xénova tamén viviron choques culturais, como a peculiar forma de tomar o café en Italia: "Vexo que se toman o café de pé, nun vaso de chupito, rápido e dun só trago", lembra Jorge Cambra.
“"Con el Erasmus he perdido un miedo grande que traía a hablar y a comunicarme"
Aránzazu Barreiro e Lucía Gago, en Pescara, destacaron a importancia de estaren xuntas e a boa acollida recibida no laboratorio de Anatomía Patolóxica dott. Mario di Loro. Aránzazu confesa que "con el Erasmus he perdido un miedo grande que traía a hablar y a comunicarme".
Ademais da formación, os estudantes aproveitaron para viaxar por Italia, visitando cidades como Roma, Nápoles e Pompeya. Jorge Cambra tamén reflexiona sobre a viaxe interior: "He mejorado la autoestima y el quererme a mí mismo, el no depender de nadie, valorar a la gente que quieres pero no a ojos ciegos, si no porque merecen la pena".
“"Vivir esta experiencia a estas edades permite que reorganices el modo de mirar el mundo y de mirarse a uno mismo en un momento perfecto para llegar a la vida adulta más enfocado y con las ideas más claras"
Miguel Carballa, director do CIFP Montecelo, reafirma o compromiso do centro con estas bolsas: "En este centro seguiremos apostando por estas becas todo lo que podamos". Os seis estudantes regresarán a Pontevedra nas próximas dúas semanas, enriquecidos pola súa experiencia internacional.
