A Deputación de Pontevedra asistiu en Quimper, Francia, á sexta reunión do consorcio BEAP-MAR e do Pill-5. Estes encontros reuniron representantes do ecosistema azul do espazo Atlántico baixo o título “Avances na bioeconomía azul na Área Atlántica”. O proxecto BEAP-MAR, financiado polo programa Interreg Espazo Atlántico, busca promover o desenvolvemento de novos produtos e aplicacións baseados en organismos mariños, fomentando solucións innovadoras con potencial para diversos sectores.
As xornadas incluíron sesións dedicadas á investigación de vangarda e ás aplicacións industriais en biotecnoloxía mariña. Presentáronse tamén solucións relacionadas coas macro e microalgas, a valorización da biomasa mariña e o aproveitamento de compostos bioactivos dirixidos á industria cosmética.
A Deputación de Pontevedra colabora neste proxecto xunto coa Universidade de Santiago de Compostela. Tamén participan socios de Portugal (Instituto Politécnico de Leiria e a Facultade de Ciencias e Tecnoloxía da Universidade do Algarve), Irlanda (Galway University e Innovation & Management Centre CLG T/A WestBIC WBIC), e Francia (Axencia Nacional de Seguridade Sanitaria da Alimentación, do Medioambiente e do Traballo e a Comisión de Enerxías Alternativas e Enerxía Atómica de Francia).
