A Consellería de Sanidade e a Secretaría Xeral para o Deporte, en colaboración coa Fundación Galega contra o Narcotráfico (FGCN), impulsan a práctica deportiva fronte á adicción online co programa piloto Adestrar sen Pantallas / Safety-SPORT. O obxectivo principal é protexer a saúde mental e dixital dos menores de 12 e 13 anos.
A xornada de lanzamento e formativa desta iniciativa piloto terá lugar mañá, sábado 5 de setembro, no Centro Galego de Tecnificación Deportiva (CGTD) de Pontevedra. O programa ofrecerá máis de 10 horas de formación de alto impacto dirixida a técnicos e adestradores de diversos deportes.
O programa 'Adestrar sen Pantallas' botará a andar nos concellos da Estrada, Cambados, Ribeira e Vilagarcía de Arousa, coa meta de chegar a máis de 500 rapaces da categoría infantil en clubs de baloncesto, balonmán, fútbol e ximnasia.
Desde a perspectiva da saúde pública, a Xunta busca que esta metodoloxía se converta nunha referencia exportable ao Plan Nacional de loita contra os trastornos aditivos. O proxecto conta cun deseño profesionalizado, coa supervisión científica da Universidade de Santiago de Compostela (USC) e da Universidad Internacional de La Rioja (UNIR), e implántase baixo un modelo de execución estándar e replicable, apoiado en métricas estritas de eficacia.
O evento comezará ás 9:30 horas no CGTD de Pontevedra coa participación de representantes do Goberno galego, o doutor Antonio Rial Boubeta (USC) e Manuel Couceiro Cachaldora, presidente da FGCN. O doutor Joaquín González Cabrera (UNIR) impartirá talleres prácticos divididos en 'Módulo Deportistas' e 'Módulo Familias'.
Os psicólogos deportivos Abel Nogueira López (excoordinador de categorías inferiores do Racing de Santander) e Elkin A. Flórez Domínguez (director da Residencia do R.C. Deportivo da Coruña) pecharán a xornada cunha guía de dinámicas emocionais de alto rendemento para adestradores.
'Adestrar sen Pantallas' céntrase no desenvolvemento de competencias emocionais e relacionais, nos riscos do uso abusivo de pantallas e en estratexias para o benestar dixital. Búscase concienciar ás familias e á comunidade para fomentar o deporte como alternativa de ocio saudable.
