A proposta, enmarcada na candidatura continuísta liderada por Belén Rubio, considera unha vantaxe a experiencia previa na xestión universitaria. Segundo a candidatura, esta perspectiva permite unha análise realista dos problemas e a formulación de solucións axeitadas para o campus de Pontevedra.
“"Penso que os problemas os temos os tres candidatos moi ben detectados. O que non teño tan claro é que todos teñamos as solucións máis acaídas. Pola nosa banda témolos moi ben analizados e cunhas medidas moi claras para resolvelos."
Entre as principais eivas detectadas, ademais da residencia, atópanse a problemática dos espazos e infraestruturas, así como o desenvolvemento do Campus de especialización. A candidatura destaca a importancia do financiamento da Xunta para o Campus Crea, que busca converterse nun referente en investigación e captar talento en liñas vinculadas á creatividade.
“"O Campus Crea non é un campus de facultades, senón de investigadores, para todos os que traballen en creatividade."
A construción da residencia universitaria é un proxecto tanxible, con negociacións avanzadas sobre parcelas ofrecidas polo Concello e unha liña de financiamento a través de créditos ICO Vivenda do Ministerio. A candidatura recoñece que a construción de novos edificios leva tempo, pero aposta por unha reorganización dos espazos existentes para atender as necesidades de titulacións como Belas Artes, que experimentaron un crecemento significativo.
