A firma Amásame Bakery Lab, coñecida pola súa panadaría artesanal e polos múltiples recoñecementos recibidos, anunciou o peche dun dos seus puntos de venda na rúa Castelao da cidade de Pontevedra. Esta decisión non responde a dificultades económicas, senón a unha elección persoal dos seus promotores para priorizar o tempo e a calidade de vida.
O impulsor do proxecto, Dani Pampín, explicou a través dun comunicado nas redes sociais que a medida se toma "con corazón" e co desexo de "recuperar tempo para vivir, facer mellor as cousas e volver desfrutar plenamente do oficio que amamos". Xunto á súa muller, Nati, puxo en marcha a primeira tenda hai sete anos e agora, aos 36 anos, considera que o maior éxito é dispoñer de tempo suficiente para estar cos seus fillos.
A vida escapa moi rápido.
Pampín sinalou que a xornada laboral comeza ás catro da mañá no obradoiro e esténdese ata ben entrada a mañá con repartos e entregas, sumado á xestión dun negocio propio e á crianza de dous nenos pequenos. A decisión tamén se viu influenciada por unha recente recomendación médica para "levantar o pé do acelerador".
A pesar de que o establecemento da rúa Castelao atópase no seu "mellor capítulo", o empresario rexeitou hai tres anos unha proposta de investimento de medio millón de euros, convencido de que o crecemento desmedido lle suporía máis "agobio" e "preocupación". Subliña que "medrar non sempre significa avanzar" e que o seu concepto de Amásame está ligado a unha forma de vivir o pan, onde o tempo ten tanto ou máis valor que o diñeiro.
O peche, previsto para o vindeiro 28 de xuño, implicará o despedimento dunha traballadora. Non obstante, Pampín recalca que se trata dun "cambio de rumbo" e non dun adiós definitivo, xa que os esforzos centrarase na tenda da Praza dos Maios, o punto de partida da firma.
A noticia xerou reaccións tanto na clientela fiel como entre compañeiros do gremio, moitos dos cales lamentan non poder tomar unha decisión similar debido á intensidade do seu traballo no obradoiro.
