O Poio Pescamar confirmou este mércores a renovación da súa capitá, Alejandra de Paz González, nada en Neda no 1995. A xogadora sumará a súa oitava tempada co conxunto conserveiro, a cuarta de forma consecutiva, despois de que o club anunciase tamén a continuidade de Luis López-Tulla como adestrador ata 2028.
Dende a entidade subliñan que a historia do club "non se entende" sen Ale de Paz, quen estivo presente en oito das catorce tempadas que o equipo disputou en Primeira División. A súa traxectoria inclúe tres Copas Galicia, sendo a xogadora con máis títulos gañados co Poio Pescamar. Ademais, a súa faceta internacional complétase con dous campionatos de Europa con España e un bronce mundial.
“"A historia do club "non se entende" sen Ale de Paz."
Na vindeira campaña 2026/27, Ale de Paz continuará ampliando a súa lenda. Recén convertida na xogadora con máis partidos na historia do club (238, superando os 223 de Irene García), tamén se achega a ser a máxima goleadora histórica. Na última tempada, a primeira como capitá, foi a máxima anotadora do equipo con 22 tantos (18 en liga), superando a súa marca persoal de hai case unha década.
A súa implicación e peso no equipo son indiscutibles. Acumulou 30 participacións directas de gol, contribuíndo a que o conxunto loitase por grandes obxectivos, incluído un play-off polo título. O club destaca que "máis aló dos números, a súa implicación co club e as categorías base fan de Ale un referente para todos, grandes e pequenos".
