Tras unha tempada no club, o futbolista vasco Alain Ribeiro anunciou a través das súas redes sociais que non continuará no Pontevedra CF a próxima campaña. Ribeiro chegou ao conxunto granate o pasado verán e, tras un ano no que se converteu nunha peza clave e moi apreciada pola afección, emprende un novo camiño.
Nun comunicado, o xogador cualificou a súa etapa en Pontevedra como "un ano inesquecible" e afirmou que atopou "algo máis ca un club: atopei unha familia". Agradeceu o cariño, o respecto e a confianza que recibiu dende o primeiro día, especialmente nun momento persoal "difícil" que atravesaba cando chegou á cidade.
Ribeiro expresou o seu desexo de ter "devolvido sobre o campo todo o cariño" recibido, asegurando que deu "o 100% por este escudo, por esta cidade e por esta camisola ata o último día". Recoñeceu que a despedida "quizais chega antes do que a moitos nos gustaría", pero marcha "coa tranquilidade de telo dado todo" e cun "profundo agradecemento" a todas as persoas que formaron parte do seu camiño.
O xogador, que chegou procedente do Numancia, foi un home importante no esquema do adestrador Rubén Domínguez. Con 2.645 minutos disputados, Alain Ribeiro marcha do estadio de Pasarón como o máximo goleador do equipo esta tempada, con un total de 10 tantos.
Esta é a primeira baixa confirmada do Pontevedra CF para a vindeira campaña, unha saída que o propio xogador se encargou de anunciar publicamente.
