Segundo o informe trimestral de prezos de venda de pisos.com correspondente a marzo de 2026, a capital pontevedresa rexistrou unha subida significativamente maior que outras urbes españolas. Mentres Pontevedra creceu un 3,02%, Madrid apenas o fixo un 0,55%, Barcelona un 0,08% e Vigo, a principal cidade galega, un 0,18%. Só Ciudad Real (4,09%) e Teruel (3,29%) superaron a Pontevedra neste período.

Aínda que en termos absolutos Madrid (6.369 €/m²) e Barcelona (5.173 €/m²) manteñen prezos moito máis elevados, a velocidade de incremento en Pontevedra é notable. O metro cadrado na capital do Lérez alcanzou os 2.066 euros, situándose por debaixo da Coruña (2.898 €/m²) e Vigo (2.532 €/m²) en prezo absoluto, pero destacando polo seu dinamismo. Mentres Pontevedra encadea un trimestre de forte subida, Vigo apenas rexistra movementos e a Coruña creceu un 0,32% no mesmo período.

O contraste é aínda máis marcado con Ourense, que experimentou unha caída do 0,50% no trimestre, converténdose na cuarta capital española con maior descenso, e acumulando unha perda interanual do 5,28%. Lugo tamén pechou o trimestre en negativo, cun axuste do -0,35% e un prezo de 1.539 €/m².

A nivel provincial, Pontevedra lidera o ranking galego tanto en prezo, con 1.776 euros por metro cadrado, como en crecemento trimestral, cunha subida do 0,50%, a máis alta das catro provincias da comunidade. Lugo, no extremo oposto, foi a terceira provincia española que máis se axustou no trimestre (-0,36%) e acumula un descenso interanual do 14,96%.

Dentro da provincia, o municipio de Marín destacou cunha alza trimestral do 4,44%, sendo o concello galego que máis subiu nese intervalo, e cun incremento interanual do 22,61%, o que máis repuntou en toda a comunidade. En canto ao prezo absoluto por municipios, Sanxenxo (2.965 €/m²) foi a localidade máis cara de Galicia en marzo de 2026, superando á propia capital coruñesa e case duplicando a media rexional.