O Concello de Pontevedra fixo pública a modificación do contrato adxudicado á empresa Gómez Crespo, que se enfrontou a dificultades inesperadas. Un dos primeiros obstáculos foi a oposición das comunidades de veciños lindeiras á instalación de estadas no patio, necesaria para intervir na fachada interior do edificio.
“"Ditas dificultades ameazaban con alongar de maneira moi notable o prazo de execución da obra e, por tanto, a xustificación da subvención con fondos europeos."
Este contratempo resolveuse grazas ao uso dunha autogrúa, segundo o informe dos técnicos municipais. Ademais, o mal estado da soleira do soto obrigou a realizar "algúns remates na estrutura preexistente" durante as demolicións proxectadas, o que supuxo un segundo imprevisto.
Como consecuencia destes problemas, o custo final da obra aumentará en 48.542,38 euros, pasando de 1.536.196,58 a 1.584.738,96 euros, o que representa un incremento do 3,16% sobre o orzamento inicial. O modificado do contrato tamén implica unha ampliación do prazo de execución nun mes, ata un total de 17 meses, once meses máis do inicialmente adxudicado.
A restauración deste edificio municipal está cofinanciada nun 60% con fondos europeos Next Generation. Unha vez finalizada, a sede da rúa Alfonso XIII abrirase a novos usos, converténdose nun centro internacional de creatividade. Albergará espazos para o emprendemento, para o Seminario Permanente de Jazz e para a Universidade de Vigo, ademais de residencias artísticas.
