O delegado da Xunta en Ourense, Manuel Pardo, visitou esta mañá na cidade de Ourense o local da Asociación de veciños O Couto para supervisar os traballos de mellora acometidos con cargo a unha subvención do Plan específico de acción comunitaria da Consellería de Presidencia, Xustiza e Deportes, na convocatoria de 2025.
Manuel Pardo concretou que a asociación veciñal recibiu unha achega para optimizar a accesibilidade do local e implementar melloras en eficiencia enerxética e seguridade, beneficiando directamente aos seus usuarios.
O representante do Goberno galego lembrou que na resolución da orde deste ano foron beneficiados 90 colectivos veciñais ourensáns que solicitaron apoio para 111 proxectos (67 de obras e 44 de equipamento), co fin de apoiar o seu labor dinamizador.
Detallou que na Asociación de veciños O Couto, as actuacións incluíron a substitución de portas dos baños para mellorar a accesibilidade e a montaxe dunha fiestra de aluminio para eficiencia enerxética. Tamén se reparou o teito, instalouse unha tarima sintética e colocáronse luminarias LED.
O plan tamén impulsa a rehabilitación de locais sociais e a adquisición de equipamento, así como a mellora de traídas veciñais para comunidades de usuarios de augas.
