O delegado territorial da Xunta, Manuel Pardo, desprazouse esta mañá ao concello do Riós para supervisar as obras de mellora na Casa do Concello e na instalación do parque infantil. A Consellería de Presidencia, Xustiza e Deportes investiu preto de 35.000 euros nestas actuacións, ao abeiro da orde de axudas para a creación e mellora de infraestruturas municipais.
Durante a visita, o representante autonómico informou que na convocatoria deste ano, o municipio de Riós tamén recibiu preto de 24.000 euros para a rehabilitación da praza situada en Florderrei, co fin de dotar a veciñanza dun espazo público axeitado de encontro e lecer.
Manuel Pardo destacou que a Xunta destina máis dun millón de euros en 34 actuacións en 30 concellos e catro agrupacións da provincia de Ourense. Estas axudas impulsan a calidade de vida da veciñanza das áreas rurais a través da colaboración cos concellos.
As obras na Casa do Concello consistiron na creación dunha rampla de acceso con varanda e novas escaleiras. No parque infantil, substituíronse as baldosas de caucho existentes por un caucho continuo e instaláronse novos elementos de xogo.
O representante do Goberno galego lembrou que estas iniciativas, dirixidas a concellos de menos de 30.000 habitantes, cofinancian actuacións en camiños, prazas, paseos, rúas, instalacións deportivas e outros edificios municipais, cubrindo ata o 70 % do orzamento.
A Xunta reafirma o seu compromiso co municipalismo, destinando en 2026 unha cifra histórica de 670 millóns de euros aos concellos, 30 millóns máis que o ano anterior. No ámbito da Dirección Xeral de Administración Local, inclúense axudas para proxectos estratéxicos, o Fondo de Compensación Ambiental e o Plan de acción comunitaria.
