A parroquia de Sobrado do Bispo, en Barbadás, volve a ser o epicentro cada venres para os integrantes da Asociación Cultural Voces e Cordas. Alí, entre ensaios e encontros, celebran catro décadas de vida musical que para moitos supón moito máis ca unha simple afección. "Me serve de terapia", sinala Flora Varela, secretaria da entidade e unha das fundadoras.
A entidade naceu oficialmente o 1 de febreiro de 1986, aínda que as súas raíces son máis antigas, ligadas á tradición de formar un coro parroquial para a misa de Reis. A iniciativa dun novo párroco e doutros veciños transformou esta costume nun proxecto estable que mantivo viva a actividade musical ao longo do ano, converténdose nun motor cultural para Sobrado do Bispo.
Ao longo dos anos, a coral chegou a congregar preto de medio cento de voces, pero o paso do tempo e a falta de relevo xeracional reducírona hoxe a 18 membros. "A xente nova asocia cantar nun coro cunha actividade de maiores e prefire dedicar o seu tempo a outras cousas", lamenta Manuel Gómez, membro da coral dende hai 18 anos.
A pesar dos desafíos, o espírito de unión mantense intacto. "Somos como unha familia", afirma Varela, destacando os lazos creados durante ensaios, actuacións e viaxes por Galicia e Portugal. Gómez engade que están "moi contentos con todo o que fixemos durante estes anos".
A celebración do 40 aniversario terá lugar este sábado ás 20:00 horas na igrexa parroquial. O programa inclúe un concerto da Banda de Música Cultural de Barbadás, actuacións das Pandereteiras e Cantareiras Vagalumes, o coro xuvenil Sauti Yangu Tu de Taboada e a propia coral anfitrioa.
O obxectivo principal da asociación segue sendo que a música continúe soando en Sobrado do Bispo. "Temos que ir ano tras ano, non nos queda outra", conclúen dende a entidade.
