A conselleira de Vivenda e Planificación de Infraestruturas, María M. Allegue, xunto ao delegado territorial da Xunta en Ourense, Manuel Pardo, visitou hoxe as obras de rehabilitación de dous inmobles no centro histórico da cidade. Estas actuacións permitirán acadar seis vivendas de promoción pública ao abeiro do programa Rexurbe.
Allegue lembrou que a través deste programa, a Xunta adquire inmobles nos centros históricos para rehabilitalos co obxectivo de incrementar a oferta de vivenda accesible e revitalizar os cascos históricos galegos, ademais de asentar poboación. A conselleira visitou os traballos nun inmoble na praza Manuel Sueiro, que dará lugar a 5 vivendas públicas, e posteriormente os que se executan noutro edificio da rúa Pelaio, para acadar unha nova vivenda pública.
O investimento conxunto en ambos inmobles acada 1,9M€ e conta con cofinanciamento de fondos europeos. Prevese a finalización dos traballos o vindeiro 2027. As vivendas entregaranse en alugueiro accesible entre persoas inscritas no Rexistro Único de Demandantes de Galicia, coa reserva do 40% para persoas menores de 36 anos.
Ademais, Allegue tamén visitou as obras que a Xunta está a executar no barrio ourensán de Reza para habilitar unha senda peonil ao longo da estrada autonómica OU-402. Esta intervención, cun investimento de preto de 1,5M€, creará máis de 2km de itinerario peonil para garantir desprazamentos seguros e finalizará o vindeiro ano.
