O pleno do Concello de Ourense aprobou este luns unha moción impulsada polo BNG na que se insta á Xunta de Galicia a asumir a totalidade da financiación do plan de transporte metropolitano para a cidade. A proposta saíu adiante co voto a favor dos nacionalistas e o PSOE, mentres que DO se abstivo. Unha emenda do PP, que buscaba centrar o foco só no Concello, foi rexeitada.
O debate estivo marcado polo recoñecemento do alcalde, Gonzalo Pérez Jácome, sobre a inviabilidade económica do modelo proposto. Segundo estimacións da Deputación, o custo por viaxe sería de 29 euros, o que o rexedor considera "desorbitado" e suxire que a Xunta "reforce con máis frecuencias" os servizos actuais e aporte financiación ao Concello para transbordos gratuítos co autobús urbano.
Dende o BNG, Xosé Manuel Puga cualificou a situación como "acta de defunción" do plan, defendendo que "non pode ser cuestión de cartos". Pola súa banda, Alba Iglesias, do PSOE, lamentou a "marxinación" de Ourense, afirmando que "o que vale para outras cidades non vale aquí". A popular Ana Méndez suxeriu sentar coa nova concesionaria do bus urbano para estudar os custos.
Finalmente, Xosé Manuel Puga concluíuu sentenciando que "o proxecto piloto debe correr a cargo da Xunta", cuxo custo anual, segundo cálculos técnicos, ascendería a tres millóns de euros.
