O equipo de Eiroás, coa vitoria por 4-0 fronte ao Coles no seu propio campo, asegurou o título da Segunda Futgal. Este triunfo non só lles outorga o campionato, senón que tamén sela o seu segundo ascenso á Primeira Futgal, categoría á que regresan dous anos despois.
“"Unha boa noticia para o barrio. Sabemos que neste lado da cidade, en principio non había ningún en Primeira Futgal. A clave é ter formado un bo grupo de xogadores, que son colegas e amigos, de aí que todo saíu ben, como o ter logrado gañar os primeiros 21 partidos de liga."
O adestrador do conxunto campión destacou que o equipo non partía como favorito ao inicio da tempada. A pesar de que outros equipos como o Seixalbo, Rocas e Vilariño eran os máis mencionados, o traballo e a dedicación dos xogadores foron clave para alcanzar o éxito.
“"Non partiamos como favoritos e cando todo o mundo falaba de Seixalbo, Rocas e Vilariño, os rapaces, a través do traballo, conseguiron que fósemos nós os campións. O feito de gañar tantos partidos seguidos, visto desde dentro, foi moi difícil, non é casualidade nin sorte, pero si que tivo un grao de dificultade e de tensión competitiva."
Desde a directiva, a alegría é palpable. Este ascenso representa unha gran ilusión para todo o club e os seus afeccionados, ademais de significar que o barrio estará representado na máxima categoría provincial. O principal obxectivo para a próxima tempada será asegurar a permanencia na nova división.
