O presidente provincial, Luis Menor, destacou durante unha rolda de prensa a aprobación de acordos "moi útiles" que permiten "resolver problemas" dos concellos ourensáns.

Entre as localidades que recibirán financiamento atópanse Boborás (18.000 euros), Entrimo (50.000 euros), A Gudiña (34.000 euros), Monterrei (25.000 euros), Nogueira de Ramuín (7.000 euros), Paderne de Allariz (10.575,40 euros), Piñor (40.000 euros), Punxín (30.000 euros), Riós (39.661,28 euros), Porqueira (7.837,65 euros en dúas axudas), San Amaro (40.000 euros), Viana do Bolo (21.000 euros) e Xunqueira de Ambía (39.997,82 euros).

Ademais, a administración provincial aprobou o expediente para contratar a concesión do servizo público supramunicipal de recollida e recepción de residuos industriais non perigosos e especiais.

Por outra banda, Luis Menor valorou de forma positiva a Comisión de Diputaciones, Cabildos y Consells Insulares da Federación Española de Municipios y Provincias celebrada en Valencia.

O presidente provincial insistiu na "necesidade urxente" de reformar o sistema de financiamento das administracións provinciais e municipais, asegurando que son "as grandes esquecidas do país" malia ser as primeiras en prestar servizos á cidadanía.

Así mesmo, reclamou cambios nas regras fiscais e unha reforma da Lei de Contratos do Estado, especialmente para facilitar a xestión en municipios de menos de 5.000 habitantes, unha realidade que afecta a boa parte da provincia de Ourense.