A Consellería do Medio Rural mantén un compromiso firme coa viticultura galega, inxectando importantes recursos para potenciar un sector que conta con cinco Denominacións de Orixe (Valdeorras, Ribeiro, Rías Baixas, Monterrei e Ribeira Sacra) e cinco Indicacións Xeográficas Protexidas.
Unha das principais liñas de axuda é a convocatoria para a reestruturación e reconversión de viñedo, que para o ano 2026 dispón dun orzamento de 4 millóns de euros. O prazo para presentar solicitudes remata o vindeiro 27 de abril. O obxectivo é incrementar a competitividade das explotacións, adaptalas ao cambio climático e facelas máis sustentables ambientalmente.
Estas subvencións están dirixidas a financiar reaxustes estruturais no viñedo galego, buscando reducir os custos de produción e mellorar a xestión técnica. Tamén se apoian os reaxustes varietais para favorecer a orientación ao mercado, adaptando a produción á demanda e preservando as variedades autóctonas de alta calidade. Na convocatoria de 2025, esta iniciativa beneficiou a 132 viticultores.
“"Dende o 2018, o Goberno galego destinou máis de 20 millóns de euros a estes apoios para beneficiar a máis de 1.200 viticultores e facilitar que se levasen a cabo actuacións en algo máis de 1.700 hectáreas."
Ademais, a Consellería do Medio Rural impulsa axudas para a elaboración e comercialización de produtos vitivinícolas, así como para a súa promoción en terceiros países. No ano 2025, destináronse 6,7 millóns de euros a estas liñas, que xa foron convocadas para 2026. As axudas para elaboración e comercialización beneficiaron a 27 entidades, principalmente nas provincias de Ourense e Pontevedra, cun investimento subvencionable de 18 millóns de euros.
Estas iniciativas buscan mellorar o rendemento global das empresas do sector, adaptalas ás demandas do mercado, fomentar a certificación ambiental, a produción ecolóxica e a innovación. Tamén promoven o incremento da dimensión empresarial, a participación dos viticultores na cadea de valor e a introdución de tecnoloxías dixitais. As axudas para a promoción en terceiros países, que contaron con 18 entidades beneficiarias e un importe de 1,27 millóns de euros, teñen como fin dar a coñecer a calidade dos viños galegos e mellorar a súa competitividade internacional.
No período comprendido entre 2018 e 2025, a Consellería do Medio Rural investiu preto de 40 millóns de euros nestas dúas liñas de axudas, co financiamento do Fondo Europeo Agrícola de Garantía Agraria (Feaga).
