O xacemento arqueolóxico do Castro do Teso da Ermida, situado en Navia de Suarna, será o escenario este mércores, 28 de outubro, dunha visita guiada aberta ao público. O obxectivo é dar a coñecer os resultados da recente campaña de investigación, posta en valor e mellora do espazo de visita. A sesión comezará ás 17,00 horas e será de acceso libre.
A Consellería de Cultura, Lingua e Xuventude da Xunta de Galicia, en colaboración co Concello de Navia de Suarna e a Asociación Ser, financiou esta actuación cun total de 20.000 euros. O equipo técnico responsable dos traballos presentará as conclusións da intervención.
O Castro do Teso da Ermida, localizado preto de Vilela na parroquia de Santa María de Son, é un asentamento castrexo de aproximadamente dúas hectáreas. Situado nun esporón rochoso, relaciónase coa explotación aurífera na antigüidade e destaca polo seu recinto amurallado, representativo da Idade do Ferro en Galicia.
A última campaña centrouse na escavación duns 30 metros cadrados no sector 2, continuando as intervencións previas para completar a planta de tres vivendas e mellorar o itinerario de acceso e interpretación para os visitantes. Tamén se realizaron labores de limpeza, roza, consolidación e acondicionamento de estruturas escavadas nos últimos anos.
Dende o ano 2020, realizáronse diversas campañas que permitiron a conservación, caracterización e posta en valor do castro, incluíndo a restauración da antiga ermida situada no seu ámbito. A intervención de 2025 ampliou o sector 2, revelando sete vivendas (catro completas e tres parciais), ademais de zonas de paso, muros e sistemas de drenaxe.
