O delegado territorial da Xunta en Lugo, Alfonso Villares, mantivo hoxe unha reunión co alcalde de Baralla, Miguel González, para tratar diversos proxectos en marcha e futuras iniciativas para o municipio.
Villares destacou os investimentos en infraestruturas viarias, con actuacións nas estradas autonómicas LU-710 e LU-621. Na LU-710, a obra de acondicionamento dun treito de 4,5 quilómetros entre a N-VI e a A-6 atópase na fase final, cun orzamento de 2,3 millóns de euros.
Así mesmo, estase a piques de adxudicar o reforzo do firme da vía LU-621, que conecta A Pobra de San Xiao (Láncara) con Baralla. O Goberno galego destina 655.300 euros para actuar en 7,7 quilómetros desta estrada.
O delegado tamén salientou o impulso ao emprego local co financiamento dunha nova edición do obradoiro dual Via Künig, que se desenvolve en Baralla, As Nogais e Becerreá. A Consellería de Emprego, Comercio e Emigración achega 492.500 euros a esta iniciativa, que ofrece formación en construción a unha vintena de persoas desempregadas.
Esta xuntanza enmárcase na rolda de encontros institucionais que Villares mantén cos alcaldes lucenses para reforzar a cooperación administrativa na provincia.
