Os traballos, declarados de emerxencia, buscan corrixir os danos na impermeabilización provocados polo temporal de vento do pasado 11 de febreiro, cando varias láminas do teito do túnel se desprenderon. A intervención implicará a instalación dunha nova lámina impermeabilizante na bóveda para garantir a seguridade e durabilidade da estrutura.

Debido ao corte total da vía nun tramo de case un quilómetro e medio (entre os puntos quilométricos 463,100 e 464,500), habilitarase un paso na mediana para que a circulación en sentido Madrid opere en modo bidireccional, cun carril para cada sentido.

Esta actuación súmase a outras melloras na Autovía do Noroeste. Dende o pasado 27 de abril, o túnel de Pedrafita está en obras de renovación de sistemas de drenaxe e protección contra incendios, cun corte entre os puntos 431,2 e 432,2. Espérase que rematen o vindeiro luns, día 25.

Ademais, dende o día 8 e ata este mércores, estase a renovar o firme nos túneles bercianos de Trabadelo, Villafranca e La Escrita. En Trabadelo e Villafranca houbo cortes en ambos sentidos ata o día 14. En La Escrita, tras o corte cara Madrid, pecharanse os carrís cara A Coruña entre os quilómetros 417,8 e 418,0 dende hoxe martes 19 ata mañá mércores 20.