O Centro de Formación e Experimentación Agraria (CFEA) de Becerreá, coñecido como Escola de Alta Montaña, está a consolidar a súa oferta de ensinanzas especializadas, segundo destacou o delegado territorial da Xunta, Alfonso Villares, durante unha visita ao centro acompañado do seu director, Carlos Vázquez.
A oferta formativa inclúe dous ciclos de Formación Profesional do eido forestal, nos que este curso están matriculados 64 alumnos e alumnas (50 homes e 14 mulleres). Deles, 19 cursan o ciclo medio de Aproveitamento e Conservación do Medio Natural, mentres que 45 o superior de Xestión Forestal e do Medio Natural. A alta compoñente práctica destas ensinanzas facilita a inserción laboral inmediata do alumnado en postos como prevención de incendios, bombeiros forestais ou axentes ambientais.
Ademais, o centro, dependente da Consellería do Medio Rural, imparte formación continua agrogandeira e forestal. Neste período, programáronse 22 cursos nos que se inscribiron 419 persoas, con preferencia para titulares de explotacións agropecuarias. Destacan os oito cursos de apicultura, con 125 alumnos, e outros sobre manipulación de produtos fitosanitarios, manexo de maquinaria, novas tecnoloxías no agro, micoloxía, defensa contra incendios, reprodución de gando vacún, aplicacións cartográficas dixitais, taller de cercas fixas de arame, poda, coidado e rexeneración de soutos, e cultivo de maceiras de sidra.
O CFEA de Becerreá aspira a converterse nun centro de referencia en Galicia nas ensinanzas de apicultura, unha especialización na que xa conta cunha ampla experiencia. O obxectivo a curto prazo é impartir o Certificado Profesional de Apicultura, de ámbito estatal. Para iso, estanse a ampliar as instalacións, incluíndo unha nova aula apícola e a futura habilitación dun laboratorio xunto ao apiario de 15 colmeas.
Alfonso Villares subliñou a importancia de desenvolver especializacións vinculadas á actividade propia de cada zona para impulsar o rural e promover a profesionalización do sector agrogandeiro.
