O Concello de Cerdido cualificou de éxito a XXXII edición da Feira do Cabalo da Barqueira, que tivo lugar o domingo no municipio. Este evento está firmemente establecido como unha das citas máis salientables no calendario municipal e no ámbito ecuestre da comarca. A xornada contou cunha participación superior á da edición anterior, con máis de 90 xinetes inscritos, e atraeu a criadores, afeccionados e público en xeral.
Os asistentes puideron gozar dunha variada programación de probas e actividades ecuestres durante toda a tarde, ademais de aproveitar a oferta gastronómica e os diversos postos da feira. No eido da competición, realizáronse probas de andadura nas modalidades serrada e chapeada, e entregáronse premios ao mellor poldro e aos participantes de maior e menor idade.
“"A Feira do Cabalo da Barqueira é unha das nosas grandes citas anuais, non só polo seu valor cultural, senón tamén porque contribúe a dinamizar o rural. Segue a ser un punto de encontro para veciñanza e visitantes."
Entre os galardóns entregados, ademais dun saco de penso para o gañador de cada categoría, destacaron o Trofeo Casa Viuda da Barqueira e os patrocinados por establecementos colaboradores como Casa Ignacio, Rincón de Tania ou Mesón Froallo. O Concello de Cerdido tamén recoñeceu ao mellor poldro de menos de dous anos e á amazona ou xinete de menor e maior idade, subliñando o relevo xeracional nesta afección local. A oferta culinaria, con postos de polbo e churrasco, foi un dos atractivos da xornada.
Ante os excelentes resultados de participación e afluencia, o goberno municipal expresou o seu agradecemento polo esforzo da organización e a implicación de todas as persoas e entidades colaboradoras que fan posible a continuidade desta importante cita anual.
