A Xunta de Galicia achegou máis de 600.000 euros para a mellora da rede eléctrica e a renovación da capa de rodaxe nun dos accesos ao polígono industrial de Anxeriz, en Tordoia. A delegada na Coruña, Belén do Campo, e o alcalde do municipio, Antonio Pereiro, visitaron as instalacións para supervisar as actuacións.
As obras de reforzo e extensión da rede de distribución eléctrica contaron cunha achega autonómica de máis de 560.000 euros. Ademais, o polígono recibiu o ano pasado máis de 34.000 euros para a mellora da capa de rodaxe do acceso ao sector S-04. Estas intervencións buscan facilitar a captación de investimentos e mellorar a competitividade das empresas galegas.
A mellora da rede eléctrica foi necesaria debido ao crecemento da urbanización e do solo industrial e residencial, xa que a potencia instalada resultaba insuficiente e provocaba cortes de subministración. As obras incluíron a adecuación e reforma dos centros de transformación, pasando de 250 e 400 KvA a 900 KvA cada un, así como a adecuación e construción de liñas subterráneas, soterrando máis de 2 quilómetros de tendido eléctrico. O prazo de execución adiantouse ao 2025.
A delegada tamén informou sobre unha nova orde de axudas da Xunta, aberta este ano, destinada ao reforzo e extensión das redes de distribución eléctrica de parques empresariais. Esta convocatoria conta cun orzamento de 2,5 millóns de euros e está dirixida aos concellos galegos, cun prazo de solicitude aberto ata o 28 de agosto de 2026. As axudas financiarán actuacións a executar entre 2026 e 2028.
A intensidade da axuda será, con carácter xeral, do 80 % do importe subvencionable, cun máximo dun millón de euros por solicitude. A iniciativa busca mellorar as infraestruturas enerxéticas, facilitar a implantación de novas empresas e impulsar o desenvolvemento económico de Galicia.
Na comarca de Santiago, o Concello de Ordes tamén recibiu unha achega de máis de 130.000 euros na mesma convocatoria.
