O departamento autonómico financiará integramente a actuación, que inclúe a licitación e execución dos traballos. O Concello de Oroso cederá os terreos necesarios e encargaranse do mantemento posterior.
As melloras previstas inclúen o reforzo do peche perimetral, a instalación de papeleras especiais, dispensadores de bolsas hixiénicas, fontes adaptadas para cans e unha nova área de xogo con obstáculos e rampas. A superficie do parque ampliarase de 950 m² a uns 1.100 m², engadindo tamén bancos e árbores para garantir zonas de sombra.
A conselleira de Medio Ambiente e Cambio Climático, Ángeles Vázquez, e o alcalde de Oroso, Álex Doval, asinaron o protocolo de colaboración para executar esta mellora integral. Vázquez destacou a importancia destes espazos para o exercicio, xogo e socialización dos animais de compañía.
Esta iniciativa enmárcase nun plan da Xunta para promover parques caninos en concellos galegos. Oroso é o quinto municipio en asinar un protocolo de colaboración, sumándose a Ferrol, Ourense, Pontevedra e Lugo. O concello conta con 2.888 cans rexistrados no Rexistro galego de identificación de animais de compañía (Regiac).
Ademais dos parques caninos, a Xunta impulsará este ano o Centro de Protección Animal de Galicia en Curtis, cun investimento de 4,5 millóns de euros, e convocou axudas por 1,36 millóns para o coidado e adopción de animais abandonados.
