A Xunta de Galicia, a través da Consellería de Presidencia, Xustiza e Deportes, apoiará con case 50.000 euros a mellora dun viario municipal que conecta as parroquias de San Román de Pasarelos (Oroso) e Fontelo (Frades). A inversión total ascende a preto de 100.000 euros.
A actuación, impulsada conxuntamente polos concellos de Oroso e Frades, centrarase na renovación da capa de rodaxe en dous tramos de case 2 quilómetros. Os traballos inclúen a reparación de fochancas, a aplicación dunha mestura bituminosa, a limpeza de gabias e a renovación da sinalización horizontal.
Belén do Campo destacou a importancia destas intervencións para mellorar as infraestruturas rurais, reforzar a seguridade e contribuír á calidade de vida da poboación, especialmente das persoas maiores.
Esta orde de infraestruturas de uso público, destinada a concellos de menos de 30.000 habitantes, conta cun orzamento de 3,5 millóns de euros e financia ata o 80% do orzamento das obras, cun límite de 50.000 euros para proxectos conxuntos.
“"A colaboración entre ambas as administracións locais é fundamental para dar resposta a necesidades comúns e impulsar actuacións que repercuten directamente no benestar da cidadanía."
A mellora das estradas municipais facilita os desprazamentos cotiáns, favorece a conexión entre parroquias e incrementa a seguridade viaria nas contornas rurais.
