O director xeral de Inclusión Social, Arturo Parrado, desprazouse este venres a Padrón para asistir á cerimonia de entrega da Medalla de Ouro da Fundación Amigos de Galicia. Os galardoados nesta ocasión foron José Antonio Rivera Casal, coñecido como Chef Rivera, e a súa muller, Pierrette Armero. O recoñecemento coincide co 50 aniversario da apertura do seu establecemento, o Hotel Restaurante Chef Rivera, e premia a súa dilatada traxectoria profesional e o seu compromiso coa devandita fundación.
Durante o acto, Arturo Parrado destacou a traxectoria profesional de José Antonio Rivera Casal, subliñando a súa profunda vinculación con Galicia. Ademais, o director xeral agradeceu o compromiso social demostrado polos premiados e recoñeceu o labor fundamental que leva a cabo a Fundación Amigos de Galicia no ámbito da inclusión social, especialmente cara aos colectivos e persoas máis vulnerables.
Para concluír a súa intervención, Parrado puxo en valor a xenerosidade de ambos os galardoados e o seu esforzo continuo para converter o establecemento Chef Rivera nun espazo de encontro e solidariedade.
