O Balidea Obradoiro actuará como anfitrión desta importante cita que reunirá a catro dos mellores equipos da categoría para loitar polo título autonómico. A organización desta fase final foi concedida ao club compostelán despois de que o seu equipo cadete lograse a clasificación para o Campionato Galego tras unha exitosa fase regular.
A competición comezará o sábado 2 de maio coas semifinais. Ás 17:00 horas, o Balidea Obradoiro enfrontarase ao Cafés Candelas Ensino, mentres que ás 19:00 horas será a quenda do duelo entre Tifón Muebles Novobasket e Ingade COB. O domingo 3 de maio xogarase o partido polo terceiro e cuarto posto ás 17:00 horas, e a gran final está prevista para as 19:00 horas.
“"A nosa canteira continúa crecendo e consolidando pasos firmes na construción dun proxecto que dá valor ao deporte base."
O director de canteira do Obradoiro expresou a súa satisfacción pola celebración do torneo en Santiago e subliñou o crecemento do proxecto formativo do club. Tamén destacou a importancia de disputar a fase final no Sar, un escenario que permitirá aos xogadores vivir unha experiencia especial e facilitará a asistencia de afeccionados grazas á súa ampla capacidade.
Por outra banda, o equipo júnior do Obradoiro Peleteiro concluíu a súa participación no Campionato de España Júnior Masculino con tres derrotas na fase de grupos, sen conseguir o pase ás eliminatorias. O conxunto santiagués caeu ante Baskonia “A”, o Barça e o Movistar Estudiantes “A”, nun grupo de gran esixencia. A pesar dos resultados, o club valora a experiencia como un impulso para o crecemento e a formación dos seus xogadores.
