O conxunto santiagués afronta o partido máis relevante das últimas dúas tempadas, unha auténtica final que determinará o seu futuro na máxima categoría do baloncesto español. O encontro terá lugar o venres ás 21:00 horas, e espérase un pavillón de Sar completamente cheo para apoiar aos xogadores.
O técnico do equipo, Diego Epifanio, subliñou a importancia de manter a concentración a pesar do ambiente de expectación que rodea o partido. Destacou que, aínda que o entorno xera unha maior axitación, o foco debe seguir estando na preparación e na resolución de dúbidas na pista. A pesar da presión, o adestrador confía na capacidade do equipo para afrontar o reto.
“"Desde o club, desde o staff, temos que facer todo o posible por controlar todo o que depende de nós para que os xogadores só se teñan que preocupar de sacar este partido adiante como foi así no resto das xornadas de liga."
A expectación é tal que, segundo o adestrador, o pavillón de Sar podería encherse dúas veces coa demanda de entradas. O club preparou unha Fan Zone con música, DJ e a participación de empresas colaboradoras como Estrella Galicia, que abrirá ás 16:30 horas nos arredores do pavillón e no hall, con food trucks dispoñibles para os afeccionados. A celebración podería continuar no mesmo lugar se o resultado é favorable, e mesmo está prevista a presenza dos xogadores despois do partido.
En canto ao rival, o Gipuzkoa, o técnico obradoirista advertiu sobre a súa evolución e fortaleza. Destacou que é un equipo que mellorou moito, con xogadores experimentados e un xogo interior moi potente, promediando 44 puntos nos últimos tres partidos. A súa defensa é considerada a mellor da competición, obrigando aos rivais a xogar de forma incómoda e destacando no rebote ofensivo.
“"Gipuzkoa cando fomos nós alí na terceira xornada estabamos os dous equipos nun proceso de entender como queriamos ser como equipos. A evolución do equipo de Sergio foi brutal."
