A iniciativa, impulsada a través do portal Actúa de Afundación, ten como punto de encontro a EDAR padronesa ás 10.00 horas. O obxectivo principal é visibilizar a conexión entre os residuos terrestres e a contaminación mariña, lembrando que case o 80% dos desperdicios no mar teñen a súa orixe no continente.

O proxecto Plancton, un Plan de Conservación Territorial da Obra Social de Abanca, lidera esta acción multidisciplinar. Busca fomentar a conservación e a sustentabilidade das actividades socioeconómicas mariñas, especialmente nas Zonas de Especial Protección para as Aves (ZEPA) de Galicia, e promover unha conciencia sostible en todos os sectores sociais, con énfase no pesqueiro.

Entre os obxectivos do plan destacan a redución de residuos costeiros e mariños, a sensibilización do sector pesqueiro en prácticas sostibles, o aumento do coñecemento sobre a biodiversidade mariña, a capacitación en sustentabilidade económica e a integración da igualdade e a axenda 2030.

As tarefas de limpeza prolongaranse dende as 10.00 ata as 14.00 horas, momento no que se realizará a clasificación e pesaxe dos residuos. A xornada conta coa colaboración da Consellería de Medio Ambiente e Cambio Climático da Xunta de Galicia e os concellos de Dodro e Padrón, sendo este último o encargado da xestión final dos materiais recollidos.