A Festa do Viño Tinto do Salnés e Exaltación das Variedades Autóctonas de Ribadumia comezou oficialmente este venres coa apertura da carpa principal, onde se sitúan os stands das 14 adegas participantes. A comitiva municipal, encabezada polo alcalde David Castro, percorreu o recinto acompañada por unha banda de gaitas, nun acto inaugural ao que asistiron xa ducias de persoas.

O rexedor expresou a súa satisfacción polo bo comezo da celebración e o apoio recibido tanto do sector hostaleiro como do público. "Estamos moi contentos, moi satisfeitos. A hostalería amosa a súa satisfacción, que ao final é para o que se fai a festa. O ambiente é moi bonito e moi animado", declarou Castro, marcado polo optimismo.

Ao longo da xornada, o recinto acolleu un fluxo constante de visitantes que puideron coñecer as propostas das 14 adegas. Esta edición pon o foco na identidade do municipio, coa presenza de showcookings protagonizados por veciños de Ribadumia. Un destes exemplos foi o de Cristian, veciño da localidade, quen abriu unha serie de demostracións culinarias que continuarán durante a fin de semana, incluíndo a participación doutra veciña premiada a nivel galego.

A xornada inaugural gozou dunha climatoloxía favorable. "Esperamos que a xente desfrute ao longo de todo o día. O tempo está acompañando moi ben", sinalou Castro, xa pensando no sábado, o día grande da celebración.

O sábado culminará coa tradicional Cata Final, cuxos resultados se coñecerán despois dun mes de traballo de selección dos viños finalistas. Ao mediodía, arredor das 12, desvelaranse os gañadores da Folla Redonda e doutras variedades ante notario, para despois ser anunciados no Xantar oficial, ao que asistirán máis de 800 persoas.

A música tamén terá un papel protagonista o sábado coa actuación de Antonio Barros xunto á agrupación músico-cultural de Ribadumia, ademais das orquestas programadas para os tres días de festa. "Será un espectáculo tremendo", apuntou o alcalde.

A festa tamén inclúe un compoñente solidario coa Andaina Solidaria que se celebrará o domingo ás 10 da mañá, á que se convida a toda a veciñanza a participar.

Castro destacou o traballo colectivo e o potencial do sector vitivinícola local, asegurando que "o viño é un recurso económico moi importante e estamos traballando para que no ano 2027 poida producirse e comercializarse con todas as garantías". Ribadumia afronta así unha fin de semana na que a tradición, o viño e a participación veciñal consolidan a Festa do Viño Tinto como un evento destacado do calendario do Salnés.