A Deputación de Pontevedra aprobou recentemente unha achega superior aos 50.000 euros destinada ao Concello de Meis. Estes fondos, procedentes do Plan +Provincia, financiarán ao cen por cen as obras de pavimentación de camiños rurais nos lugares de Pompeán e Rialdonio.
O Plan +Provincia prevé destinar este ano ao concello de Meis preto de 980.000 euros, sumando 575.000 euros correspondentes ao exercicio de 2026 e un adianto de máis de 400.000 euros da liña de investimentos para 2027.
As actuacións executaranse nos camiños de Pompeán, na parroquia de Paradela, e Rialdonio, na de San Lourenzo de Nogueira. Os traballos incluirán a ampliación da calzada mediante sobreanchos, a aplicación dunha nova capa de aglomerado en quente de cinco centímetros de espesor e a renovación completa da sinalización horizontal e vertical.
O proxecto tamén contempla tarefas previas de fresado nos entronques con outras vías. Prestarase especial atención aos enlaces coa estrada provincial EP-9508 en Pompeán e coa autonómica PO-531 en Rialdonio. O obxectivo destas melloras é optimizar as condicións de circulación e garantir unha maior seguridade para vehículos e peóns.
