Un sinistro viario saldouse con dous feridos este venres na estrada VG-4.1, concretamente na recta da Lanzada, no termo municipal de Sanxenxo. O accidente, no que se viron implicados tres automóbiles, requiriu a intervención dos servizos de emerxencia e a regulación do tráfico na vía.
Segundo informou o Concello de Sanxenxo, a colisión produciuse cando un dos coches implicados invadiu o sentido contrario. Tras golpear lateralmente a un segundo turismo, o vehículo impactou frontalmente contra un terceiro.
Como consecuencia do impacto, ambos os condutores sufriron feridas. Un deles tivo que ser excarcerado polos efectivos do GES de Sanxenxo. Tras recibir atención no lugar, foi trasladado a un centro hospitalario, aínda que a súa condición non revestía gravidade aparente.
Efectivos da Garda Civil de Tráfico desprazáronse tamén ao punto para xestionar a circulación en ambos os sentidos da VG-4.1 mentres se realizaban as tarefas de asistencia e retirada dos vehículos implicados.
O accidente xerou retencións significativas na zona, se ben non foi necesario desviar o tráfico. A Garda Civil de Tráfico fíxose cargo das dilixencias para determinar as causas exactas do sinistro.
