O grupo, que se presentará en Cangas o 8 de maio na sala Adro, ás 22 horas, chega coa xira “A primavera ten que ser nosa”. Esta etapa representa un momento de vitalidade e crecemento para a formación, que ve na primavera un símbolo de florecemento e loita colectiva.
“"É un momento vital no que as cousas nos van ben, no que vemos que o campo quere florecer, as árbores teñen froito, chove e fai sol. Temos claro tamén que é unha loita, por iso berramos no noso último CD “A primavera ten que ser nosa”."
A súa proposta musical caracterízase por unha “Galicia tropical”, inspirada nas orquestras galegas que viaxaron a América e regresaron con influencias musicais. A súa “cumbia” é unha interpretación propia, máis próxima á tradición festiva galega e ourensá, que busca tanto mover os pés como remover a conciencia.
Actualmente, a banda está composta por cinco músicos en escena (batería, percusión, baixo, guitarra, acordeón e teclado), ademais dun sonidista que contribúe cos seus efectos. Atópanse nun período de transición, explorando novas sonoridades e incorporando elementos dixitais ás súas actuacións en directo.
A celebración dos 20 anos, que se cumprirán en 2027, comezará no verán, con diversas ideas para conmemorar a efeméride co seu público. O seu primeiro concerto tivo lugar en 2007 no festival Reperkusión en Allariz.
