O GALP Ría de Pontevedra organiza en Marín o II Obradoiro de nutrición e cociña con produtos do mar, unha iniciativa que busca achegar á cidadanía o valor dos recursos mariños na alimentación diaria. Tras o seu paso por Pontevedra e Poio, o ciclo chega á localidade mariñá para ensinar a escoller, conservar e cociñar peixe e marisco.
As sesións, que terán lugar os días 2, 9, 16 e 23 de outubro no Espazo Emprendedor do Parque Azul, combinan formación nutricional e práctica culinaria. O obxectivo é que os participantes aprendan a planificar unha dieta equilibrada, a seleccionar e conservar os alimentos mariños, e a elaborar receitas sinxelas, fomentando así o consumo de proximidade.
A actividade é totalmente gratuíta e as prazas son limitadas. Para inscribirse, é necesario facelo a través do teléfono 886 21 30 15 ou mediante o formulario habilitado na páxina web do GALP.
Esta iniciativa forma parte da Estratexia de Desenvolvemento Local Participativo (EDLP) do GALP Ría de Pontevedra, coa que se busca promover os produtos pesqueiros locais, dinamizar o territorio e fortalecer a relación entre a cidadanía e o sector marítimo-pesqueiro, convertendo o coñecemento en consumo consciente.
