A Escola Naval Militar, o campus universitario da vila de Marín, xa iniciou o seu novo curso académico. A alcaldesa, María Ramallo, recibiu no Consistorio á nova promoción de alumnado que comezará a súa formación como Oficiais da Armada Española e que tamén cursará os estudos do novo Grao en Enxeñería de Tecnoloxías Navais para a Defensa.
Esta promoción, composta por algo máis de 160 guardiamarinas, das cales preto de 30 son mulleres (sendo a promoción con máis mulleres ata a data), foi recibida pola rexedora nun Salón de Plenos ateigado. Ramallo desexou ao alumnado "unha boísima estancia na nosa vila, que será a vosa casa durante este tempo" e felicitounos "por chegar ata aquí, cun camiño longo e duro, cumprindo o obxectivo polo que levades traballando e adicando esforzos neste tempo".
Ademais, a alcaldesa puxo en valor este novo grao universitario, "que se adapta á realidade dun mundo onde a ciberseguridade, a intelixencia artificial, a informática, a dixitalización… son piares fundamentais".
